Blog of Vardan Grigoryan » Մտորումներս

Տրանսլիտ GOVAZD

Vardan Grigoryan — Tue, 20 Jul 2010 19:02:31 +0000

Բլոգիս մեջ նման թեմա երբեք չեմ շոշափել, բայց NeoVision սեմինարների շարքի ժամանակ, շատ էինք խոսում հայկական տրանսլիտ հայերենով գրող բլոգների ու բլոգերների մասին, ու այս գրառումս հենց դրա մասին է:

Տրանսլիտն այնքան է ընդունվել մեր հասարակության կողմից, որ որոշ ինտերնետ պրովայդերներ նույնիսկ իրենց գովազդային պաստառները փողոցներում կպցնում են տրանսլիտ հայերենով գրված: Խոսքս սրա մասին է`

Տրանսլիտ գովազդ մեր փողոցներում

Էստեղ մեղքը չգիտեմ ինչքանով է պատկանում դիզայներին, ինչքանով տվյալ ընկերությանը, ու ինչու չէ, նաև տպարանին: Ամեն դեպքում երևույթն իմ կողմից անընդունելի է և ով ինչպես ուզում է թող հասկանա այս գրառումս:

ԵՍ ԴԵՄ ԵՄ ՏՐԱՆՍԼԻՏ ՀԱՅԵՐԵՆԻՆ…..

Youtube-ը և FIFA 2010-ը

Vardan Grigoryan — Sat, 26 Jun 2010 22:45:51 +0000

Չգիտեմ Գուգլի աշխատողներից ում խելքին ա փչել, բայց հաստատ Ֆիֆա 2010-ը լավ չի ազդում մարդկանց վրա:

Ուրեմն էս Գուգլ-ենք նոր բան են ավելացրել իրանց ՅուԹուբի վիդեոներում…Ավելի կոնկրետ այ սա.

Սա գիտե՞ք ինչ ա… Այ հենց սեղմեք, կպատկերացնեք Ձեզ մարզադաշտում նստած ու ինչ-որ մեկը կողքից ՄԵՂՎԻ ՁԱՅՆ ՀԱՆՈՂ էտ զիբիլներով գլուխներդ տանում ա:

Հեհ…աշխարհ պահի’, իջնում եմ…

Մանկութիւնս կամ մի դիզայների մասին :Ճ

Vardan Grigoryan — Thu, 17 Jun 2010 19:54:41 +0000

Էսօր Ֆեյսբուքում խմբի հրավեր էի ստացել, մի վեբ կայքի ֆեյսբուքյան խումբ էր: Սովորությանս համաձայն հայկական կայքերն անպայման մտնում եմ: Ու նման մի սովորության համաձայն կամ բնազդաբար անպայման կայքի ամենաներքևում նայում եմ կայքը սարքողների անունները: Շատ հետաքրքիր բան տեղի ունեցավ…Երբ կարդացի դիզայների անունը: Հիշեցի մի քանի տարի առաջ, երբ նոր էի մտնում վեբ-ի ասպարեզ, ու էն ժամանակ դեռ ֆրինետն էր մզզցնում , ես շատ-շատ էի հավանում մի աղջիկ վեբ դիզայների գործերը: Չգիտեմ ուրիշներին ինչքանով ա ծանոթ Thiternik անունը, բայց իմ մեջ դեռ “մանկութիւն”-ից տպավորվել էր, ու գիշերվա հազարին էլ վեր կացնեին, ասեին Թիթեռնիկն ով ա, անունն ինչ ա, միշտ էլ կպատասխանեի Էմմա Գրիգորյան /չնայած` ոչ մի կայքում հայերեն տառերով չեմ տեսել նրա անունը ու ավելի տպավորվել էր մեջս հենց լատինատառը. Emma Grigoryan /: Գովազդ չեմ համարի ու անպայման կնշեմ նրա գուցե ամենաառաջին, գուցե ոչ առաջին կայքի հասցեն` http://users.freenet.am/~thiter/ :

Պարզվեց Թիթեռնիկը վերջերս լավ էլ սոցիալական ակտվիություն ա ցուցաբերում, իսկ ինձ առիթ չի եղել նրան տեսնել, կամ էլ տեսել եմ, ու չեմ իմացել, որ դա ինքն ա: Ամենազարմանալին ինձ համար այն էր, որ ոչ մի տեղ չգտա նրա կայքի հասցեն: Գուցե չունի՞…

Մեկը մյուսի հետևից գտա նրա ԲլոգՍփոթյան և ԼայվՋրնլյան բլոգների հասցեները: Սովորությանս համաձայն չհավանեցի, երբ բլոգում գրում էր տրանսլիտ հայերենով, բայց դե…ստեղ էն ասել, քո հավանությանը սպասող էլ չկար: Շատ-շատ հավանեցի Ֆոտոդոմ-ի տիրությում գտնվող նրա ֆոտոկայքը ու Ֆեյսբուքյան նկարները: Եվ վերջում… Շատ զարմացա, երբ բլոգում ինչ-որ տեղ կարդացի, որ ամուսնացած է… Չնայած, եթե հիշողությունս չի դավաճանում… Նա պիտի որ իմ տարիքին լիներ… Հմ…այսինքն տանն ե՞մ մնացել…

Հանճարեղ Գուգլը Thiternik-ի մասին ողջ ինֆորմացիան կտա ցանկացած մարդու, դրա համար էլ ոչ մի ուրիշ հղում չեմ դնում նրա կայքերից

Բայց հիշողությունները հաճելի էին, որովհետև էն ժամանակ նա իմ ոգեշնչման աղբյուրն էր, ու նորից գտա Չնայած ասեմ, որ համարյա ծանոթ էլ չենք

Ափսոս…

Vardan Grigoryan — Mon, 26 Apr 2010 16:47:04 +0000

Էնքան դժվար ա…Երբ սպասում էիր ինչ-որ արտառոց մի բանի, բայց պարզվում ա, որ նորից նույնն ա` նորից նույն անտարբերությունն եմ զգում, նույն անզգացմունքայնությունը, նույն սառնությունը…Գուցե ես եմ էդպիսին, գուցե իրոք շուտ եմ հոգնում ամեն ինչից ու բոլորից: Ուզում եմ համոզված լինել, որ ամեն ինչի մեղավորը ես եմ, ու եթե պիտի ինչ-որ մեկը պատճառ հանդիսանա այս բաժանման, էս անգամ թող ես լինեմ: Սիրտս գուցե հանգիստ լինի էս անգամ, եթե իմանամ, որ ինձ չեն լքել, այլ ես եմ լքել:

Ես վատն եմ… Գիտեմ…

Բոլորն էլ ինչ-որ մեկի համար վատն են լինում, ու թող ես վատը լինեմ քեզ համար: Գիտես… Կներես, բայց ես չեմ ափսոսում: Առաջին անգամ կյանքիս մեջ, բաժանումից հետո ես ուրախ եմ: Իզուր չեն ընկերներս զարմանում, երբ ժպիտը դեմքիս ասում եմ “Բաժանվեցինք…”: Ինչո՞ւ են բոլորը սպասում, որ ես պիտի միշտ տխուր լինեմ:

Ես ինձ էնքան հանգիստ ու լավ եմ զգում հիմա: Սրտիս վրայից ծանր բեռն ընկավ վերջապես, վեր-ջա-պես…

Ների’ր ինձ, Աստված…

Հայկական սոցիալական ցանցեր… Համեմատություն

Vardan Grigoryan — Fri, 18 Dec 2009 20:49:04 +0000

Այսօր որոշեցի ուսումնասիրություն անել և համեմատությունների տեսքով նկարագրել հայկական սոցիալական ցանցերը: Իհարկե դրանք շատ չեն, քանի որ “գերհզոր” համադասարանցիների կայքն իր ողջ “գեղեցկությամբ” կլանել է մերոնց: Ամեն դեպքում գուցե իրականում հայկական սոցիալական ցանցեր շատ կան, բայց ես ուզում եմ համեմատել իրար հետ դրանցից ընդհամենը երեքը` druzja.am, hayutyun.am, hayland.am:

Երկար-բարակ չգրեմ, միանգամից անցնեմ ուսումնասիրությանս:

www.druzja.am

Անկեղծ կասեմ` երբ առաջին անգամ Մոսկվա կինոթատրոնի շրջակայքում գեղեցիկ վերնաշապիկով երտասարդները բաժանում էին փոքրիկ ինքնասոսնձվող թղթի կտոր, ես ուրախացա: Գնահատում եմ, երբ նախագիծը ուրույն “մարքեթինգային” քայլեր է անում: Հենց այդ երեկո գրանցվեցի այս կայքում ու, ցավով պիտի նշեմ, որ առաջին հայացքից էլ դուրԸս չեկավ: Հիմա փորձեմ մի քիչ մանրամասնեմ:

Ուրեմն քիչ առաջ փորձում էի մտնել իմ գրանցած տվյալներով, բայց պարզվեց որ ճիշտ չեմ հիշում գաղտնաբառս: Դե… Ինչպես բոլոր նորմալ մարդիկ, լրացրեցի էլ.փոստիս հասցեն, և համակարգին խնդրեցի հնարավորություն տալ փոխել գաղտնաբառս: Ու ֆունկցիոնալության տեսանկյունից առաջին հիասթափությունս եղավ այն, որ համակարգը ոչ թե ինձ հիշեցրեց իմ գաղտնաբառը, կամ ոչ թե ուղարկեց հղում, որին սեղմելով ինձ կթողներ փոփոխել գաղտնաբառս, այլ “չոր” ձևով ինձ ուղարկեց ավտոմատ գեներացված նոր գաղտնաբառ: Այսինքն, ստացվում է այնպես, որ եթե ուզում ես մեկի գլխին խաղ խաղալ, և գիտես, թե ինչ էլ.փոստի հասցեով է նա գրանցված այդ կայքում, կարող ես պարբերաբար փոխել նրա գաղտնաբառը. պարզապես լրացնում ես նրա էլ.փոստի հասցեն, և նա կստանա իր նոր գաղտնաբառը: Համաձայնեք, որ շատ մեծ թերություն է…

Պարզապես հպանցիկ ասեմ նաև, որ շաաաաատ մեծ դժվարությամբ են բեռնում այդ կայքը իմ բոլոր 4 բրաուզերները` firefox, chrome, ie, opera: Իհարկե չեմ բացառում, որ խնդիրը կարող է լինել նաև նրանց լատվիական հոսթինգ պրովայդերից, որի անունը իհարկե չեմ տա, բայց նաև պիտի նշեմ, որ իմ խորին համոզմամբ այդ հոսթինգ պրովայդերի կայքն էլ է գտվում նույն սերվերների վրա, իսկ այդ կազմակերպության կայքը վայրկյանների ընթացքում բեռնավորվում էր:

Վերջապե~ս մտա ներս: Բայց… 90-ականները հիշեցնող դիզայնը հուշում է, որ կայքը երևի դիզայներ չի ունեցել, կամ լավ փող չեն տվել : Երևի թե մարդիկ տեղյակ չեն նոր համակարգերի մասին` ասենք, օրինակ ajax տեխնոլոգիայի մասին:

Ուշադրություն չդարձնենք դիզայնին, որը սակայն գրեթե անհնար է, և տեսնենք` ինչ կա ներսում: Իսկ ներսում հիմնականում նույնն է, ինչ համադասարանցիների մոտ` Ընկերներ, Ընկերների ընկերներ, ծննդյան տոներ, հրավերներ, հաղորդագրություններ, ֆավորիտներ, լուսանկարների գնահատականներ, ֆորում և այլն, ավելին` նույնիսկ ՕՆԼԱՅՆ-ի նկարն է համադասարանցիների նման: Ուրեմն ասեմ, թե ինչ նոր ֆունկցիաներ կան այս կայքում, որը չկա համադասարանցիների մոտ`

Ակցիա. Յուրաքանչյուր քո կողմից հրավիրված ընկեր քեզ նվիրում է 1 բոնուս, իսկ յուրաքանչյուր 5 բոնուսի դիմաց դու կարող ես պրոֆիլիդ նկարների քանակը ավելացնել մեկով: Դե քանի որ նախնական վիճակում հնարավոր է ավելացնել ընդհամենը 3 հատ նկար, ապա իմ կարծիքով աշխատող ակցիա է:
Լուսանկարների ԹՈՓ. Ահա այսպես են մարդիկ անվանել լուսանկարների ռեյտինգային դասակարգումը` ըստ ընկերների գնահատականների: Ահա այստեղ մի տեսակ փորձում են նաև արհեստականորեն ծանոթացնել թոփ-ի միևնույն տեղերում գտնվող աղջկան և տղային, նրանց նկարները իրար կողքի դնելով և փորձելով հասկացնել, որ “Բան արեք, բան ըլնի…”:
Կա ինչ-որ գաղտնի երկրպագու, որի իմաստը այդքան էլ չհասկացա, միայն հասկացա, որ կարող ես դառնալ ցանկացած մարդու երկրպագու և եթե երկրպագու դառնալու ֆորմայում չլրացնես քո տվյալները, ապա կդառնաս ԳԱՂՏՆԻ ԵՐԿՐՊԱԳՈՒ: Բայց թե ինչի համար, դա արդեն անհասկանալի մնաց ինձ
ԲՈՆՈՒՍՆԵՐԻ ԽԱՆՈՒԹ. Այստեղ կարող ես քո ձեռք բերած միավորները փոխարինել ինչ-որ բաներով` VIP նվեր, 10-ով գնահատելու հնարավարություն և նման բաներ:
Ամենակարևորը թողել էի վերջում, ՈՒՇԱԴՐՈՒԹՅՈՒՆ, նորույթ` “Ընկերների ընկերների ընկերներ”… ինձ թվում է, որ խոսքերն ավելորդ են:

Ահա այսքանը կասեմ այս կայքի մասին: Լավն է, թե վատը, կգնահատեք Դուք, որովհետև ինչպես ասում են. “Ճաշակին ընկեր չկա”…

www.hayutyun.am

Նախ սկսեմ նրանով, որ հարգեցի այն առումով, որ առանձնացված սերվեր ունեն կայքի համար: Սա դիտարկում եմ, որպես առավելություն նախորդի համեմատությամբ: Ինչ կարող եմ ասել ընդհանուր առմամբ դիզայնի մասին, իմ կարծիքով գեղեցիկ է: Կայքն ինքնին ամեն ինչ հեշտացված է: Ամեն ինչ աչքիդ առաջ է, ու շաաաաաատ մեծ տառերով, դե իսկ ajax տեխնոլոգիան այստեղ արդեն կա:

Փորձեմ էլի հերթականությամբ ասել.

Այս կայքում կա այսպես ասած ՍՏԱՏՈՒՍ-ի տեղ, որը չկար նախորդ կայքում:
Կա անձնական էջի հասցե, որը հեշտացնում է ինչ-որ մեկին միանգամից գտնելու գործողությունը. պարզապես տալիս ես քո ընկերներին անձնական էջիդ հասցեն, որով միանգամից քեզ գտնում են: Սա իմ կարծիքով առավելություն է, որը մի ժամանակ կար համադասրանցիների մոտ, բայց հետո, չգիտես ինչու, հանեցին:
Ծանոթություններ. Այս բաժինը մի տեսակ նմանեցնում եմ հանրահայտ Մամբա-ի ծանոթության էջերին. Լրացնում ես նախ ընտանեկան կարգավիճակդ, հետո, թե ինչ սեռի մարդ ես փնտրում, հետո մազերիդ գույնը, կազմվածքդ, նյութական վիճակդ, հասակ, քաշ և շատ այլ բաներ, ըստ որոնց ծանոթությունը ավելի հաջող կստացվի:
Մասնագիտական գործունեություն. Այստեղ լրացնում ես ներկա աշխատանքիդ մասին մի քանի տեղեկություններ:
Կա CHAT, որտեղ կարող ես հաղորդակցվել օնլայն ընկերներիդ հետ:
Եվ վերջին տարբերությունը, որ ուզում եմ նշել, այն է, որ կա աշխարհի ֆլեշ-քարտեզը, որի վրա կարող ես տեսնել, թե որ պետությունից քանի հոգի կան գրանցված: Ավելին` այդ պետություն յուրաքանչյուր քաղաքի մարդկանց կարող ես տեսնել:

Երևի թե այս կայքի մասին այսքանը: Պարզապես իմ կարծիքով, հեշտ է ամեն ինչ այս կայքում, բայց ինչ-որ բան պակասում է:

www.hayland.am

Մարդիկ օգտագործում են ռուսական հոսթինգ, բայց կայքը արագ է աշխատում: Լավ է:

Օհհհհ… Երկար կարող եմ կանգ առնել այս կայքի վրա, բայց փորձեմ կարճել: Մի խոսքով, ահագին բան են փոխել իրենց կայքում` բացվելուց ի վեր: Ավելացվել են մի շարք ֆունկցիաներ, որոնք չկային ամենասկզբում: Դրանք են.

ՄԱՐԴԻԿ. Ահա այսպես է կոչվում առաջին էջի մի զգալի մասը զբաղեցնող հետաքրքիր նորույթը: Կայքը ստեղծողները փորձել են մաքսիմալ ինտերակտիվություն մտցնել համակարգում, և առանձնացրել են ՀԱՍԱՐԱԿԱԿԱՆ ԳՈՐԾԻՉՆԵՐԻՆ և ԱՍՏՂԵՐԻՆ: Սա առավելություն է այն իմաստով, որ միանշանակ հնարավոր է իմանալ, տվյալ աստղը կամ հասարակակն գործչի գրանցումն իրական է, թե ինչ-որ մեկի խաղը:
Օրագրեր. Իմ կարծիքով սա մի քիչ հիշեցնում է ԲԼՈԳՆԵՐ գաղափարը, պարզապես ֆունկցիոնալ քիչ հնարավորություններով:
Երգեր. Յուրաքանչյուրն ունի երգ ավելացնելու հնարավորություն: Լավ է այնքանով, որ ստեղծված է երգերի մեծ բազա, որտեղից շատ երգեր հնարավոր է գտնել: Սա մի քիչ նմանեցնում է Vkontakte կայքին:
Կազմակերպություններ. Խմբերի գաղափարից առանձնացրել են ԿԱԶՄԱԿԵՐՊՈՒԹՅՈՒՆՆԵՐԸ, որպես առանձին ֆունկցիոնալ տարրեր, իսկ ավանդական խմբերից բացի այստեղ կան նաև ՏԱՂԱՎԱՐ կամ ՄԻԱՎՈՐՈՒՄ/տաբեր էջերում տարբեր բառերով է գրված/ հասկացողությունը, որի իմաստն անհասկանալի էր ինձ , գաղափարն այնպիսին է, որ ըստ ինչ-որ թեմատիկայի` օրինակ ՍԵՔՍ, ստեղծում ես միավորում, և հրավիրում մարդկանց: Բայց ի՞նչ իմաստ ունի, եթե կան արդեն ԽՄԲԵՐԸ:
ԿԱՐԳԱՎԻՃԱԿՆԵՐ. Սա նույն մեր իմացած ՍՏԱՏՈՒՍ-ն է, պարզապես այստեղ կայքի առաջին էջում երևում են վերջին մի քանի ստատուսները:

Ահա և վերջ… Ավելացնելու ոչինչ չունեմ:

Հույս ունեմ շատ երկար չեմ գրել: Ներող եղեք…